Norðurlönd eru stórt, fallegt og fjölbreytt svæði sem rúmar fimm sjálfstæð ríki, þrjú sjálfstjórnarsvæði, fjölda þjóða, þjóðarbrota og tungumála og ekki síst iðandi mannlíf og menningu sem byggir á fornum arfi en nýtur í vaxandi mæli fjölþjóðlegra áhrifa. 

Norræna félagið er stórt, skemmtilegt og skapandi félag sem rúmar alla sem hafa áhuga á að efla tengsl milli Norðurlandanna og auka náið samstarf þeirra á fjölmörgum sviðum. Við viljum að það sé auðvelt og aðgengilegt að leita tækifæra til náms, atvinnu og ævintýra um öll Norðurlönd og Norræna félagið vinnur að því með öflugu félagsstarfi og fjölþættri þjónustu við einstaklinga, samtök og stofnanir.

Meðal daglegra viðfangsefna Norræna félagsins eru: Nordjobb, Upplýsingaþjónustan Halló  Norðurlönd, Norðurlöndin í bíó, Norræna bókasafnavikan - Í ljósaskiptunum, norrænt vinabæjasamstarf, Nordklúbburinn, norrænt höfuðborgasamstarf, Vox Borealis, Snorraverkefnið, Snorri-West, Norræn jól, fjölbreytt tungumálanámskeið, íslenskunámskeið fyrir Norðurlandabúa, Norðurkollunámskeið, viðburðir á vetrarhátíð, menningarnótt og öðrum bæjarhátíðum, Café Norden og margt, margt fleira.

Við bjóðum nýja félaga velkomna til þátttöku í  starfi Norræna félagsins á Íslandi og til að leggja lóð á vogarskálarnar við mótun starfsins í framtíðinni. Félagið byggir á traustum grunni hugsjóna um frið milli landa og þjóða og virðingu og réttsýni í umgengni við umhverfi og náttúru. Þessar hugsjónir voru skýrt mótaðar eftir fyrra stríð þegar félögin voru stofnuð um öll Norðurlönd. Norrænu félögin hafa frá upphafi beitt sér fyrir auknu samstarfi milli Norðurlandanna á fjölmörgum sviðum og áttu m.a. á sínum tíma stóran þátt í því að Norðurlandaráð og Norræna ráðherranefndin voru stofnuð. Bræðralag Norðurlandanna hefur skapað mikilvægann vettvang samstarfs og stuðlað að sameiginlegri þróun sem vakið hefur athygli um allan heim og þykir til fyrirmyndar og eftirbreytni. En verkinu er síður en svo lokið. Samfélagið á Norðurlöndum tekur  breytingum og umheimurinn færist sífellt nær þannig að vettvangur starfsins víkkar stöðugt og viðfangsefnin hrannast upp. Þær hugsjónir sem starf Norræna félagsins byggir á hafa kannski aldrei átt betur við en einmitt nú. Ábyrgðin sem þeim fylgir er ærin og verkefnin óþrjótandi.

Komdu og vertu með okkur í mikilvægu, spennandi og gefandi starfi.